قواريط خالتي / وليد التميمي

زائر

اصحيت فيوم على صريخ خالتي وهي بتهمر على أولادها وتقللهم ولجم يا قواريط بدكمش تنصطو عاد والأولاد بقاع الحوش مش رادين ولا صادين، حتى صحي جوز خالتي ومسج قنابة هالرمان وبلش سلخ في ابدانهم حتى سواها فككيل فككيل ومن زود ما ضرب جوز خالتي ولاد خالتي بلشت خالتي ادب الصوت وتكول الحكني يا خالتي وليد جوز خالتك موت لولاد، فقمت ارجض ومسجت ايد جوز خالتي وكلتلو وحد الله يا زلمي فقلي والله للعن والديهم جننوني لا بخلو حدى ينام ولا يتسخمط، شو بدي اسوي فيهم اقبرهم وارتاح.

وبعد ما هدي جوز خالتي بشوي كرمزنا انا وهو جنب هالتيني نشرب شوية ميرمية مغلي،ة الا جرس الدار برن وفتحت خالتي الباب الا هي عمتي ويم اول ما فتح الباب قالت لخالتي ولج وين قرودج ولا لسخمطلج اياهم، فردت خالتي ولج شو في قليلي شو مالج ردة عمتي ولج اولادج امبيرح وهمي يلعبو فدارنا بقى غطى البير مفتوح وهذول لكرود مش مخلين صرار في الجبل الا ورامينو في البير، وابو حمدي من ساعة ما قعد يتوضى الصبح لهلكيت وهو جو البير يلم في الصرارات وحلف يمين طلاق ليرمل امياتهم وهسى مش عارفه شو بدي اسوي تركتو في الدار يشط وينط، ولج اقعدي ردت خالتي فكرت في شي مهم انصتي وتخليش جوزي يسمع يتمهم هسى من الكتل وسوى جنابهم زي حبات البندورة، ولك ليش يامرملة من طلوع الفجر وهمي اينطو بالحوش وهوي بكى نايم واجى وخري بكى سهران في بيدر القمح عند الحصاده وقاملج على صوطهم مصروع ومسج هالخيزرانه وبلش يم ...

لسى خالتي ما جملت جلمتها الا الباب بخبط، وهاي المرة الصوت جاي من بره ولله لرحم ابوكم ولا لقطع ابجم والله لسوي واعمل، المهم من زود اصراخ خالتي مستجرتش تفتح الباب فقام جوز خالتي يشوف شو في الا هو المختار وابنو الصغير وملبسو هالطقية الصوف وحنا بعز الصيف، فكلو جوز خالتي شو في يا مختار ليش حسج طالع علينا من الصبح ول شو ادعوى انقطعت الدنيا ولا كامت لكيامة، فوت يا زلمي فضحتنا بباب الدار مش حلوي بحكنا خش عاد بلاش مسخرة، ففات المختار وكشف عن راس ابنو يا جماعة الخير الله لا يورجيكم شو مسوين ولاد خالتي بابنو حالكينلو نص شعراتو ومدشرين النص الثاني شوارع، وقال لجوز خالتي بترضى هيك يا ابو سالم والله لونو واحد من ولادجم بترضى يتسوى في هيج، فجاوبو جوز خالتي استريح يا مختار والله ما بتطلع الا وانت راضي ومسج يم جوز خالتي هلمقص وبلش ينجر بشعر ولادو حتى سواهم اجلكم الله مثل حمير النور مطكعين اطكع، وقلو للمختار راضي يا خوي هي ولادي صارو زي ابنك واطقع، فكام المختار بدو يطلع بعد ما شرب هوي كمان الميرمية الا لكيامه كايمه وهاي المره مش عمتي ولا المختار حمولي بحلالها وزلامها هادي عبيت خالتي وهذا الي بدو يكتل وهذا الي بدو يرمل وهذا وهذاك، ويا جماعة الخير مصيبة الي بشوف هالشوفة بكول خربة الدنيا وما راح تنتهي هلمصيبة الا بكتيل.

المهم يا جماعة الخير ربكم ستر وكان المختار لسى مش مروح فمسج جوز خالتي وكلو انصط انتى متدخلش خليني اشوف شو في، فطلع المختار وطلعت انا معا نشوف شو في الا جبير الحمولي بقول للمختار يا مختار خليك انت بعيد اليوم بدو ايصير الدم للرجب والله بنوخذ حكنا جامل ومجمل، ولما يا حبايبي شاف المختار الحديدي حاميه والشياطين بطنطط في وجوه زلام الحمولة قلهم يا عمي حكجم عندي والله لو ولد من ولادي لذبحو قدامكجم، وسحبهم عندو على الديوان فقعدو يشكو للمختار على الي مسوينو ولاد خالتي بالاول خاشين على الطابون وهادمينو ومدعوسين شتلات البندورة جلهن بحدود 4000 شتلي وجابين حمولت الجار كلها على مونة القمح والطحينن وفوك هذا كلو خانكين متين صوص ومقطمين الرمانتين واللوزة وكاسرين جرتين السمنه وباجين كربة اللبن، يعني بالمختصر خاربين ديارهم للجماعة.

وبعد ما سمعت هذا كلو كلت بنفسي يييييي والله حل مشكلة الفلسطينية واليهود اهون من هل المصيبة، شو بدو يعمل جوز خالتي هالمسجين والمهم والله المختار وجبير الحمولة بعد شد ورخي ومن هاذا جلمه ومن الثاني جلمه وصلو لحل انو جوز خالتي يعوضهم وبتعرفو يا حبايبي نتيجة ولدنت ولاد خالتي قديش دفع دفع 500 نيره، نيره تنطح نيره بس مش هاي المشكلة لانه بعد ما عاود جوز خالتي من عند المختار وبعد ما جت كل الي محوشة حلف على خالتي يمين الطلاق وكال والله مبتنامي في الدار انتي ولا قورييطج، حتى اشوف فيجم يوم وراحت المسجينة خالتي على دار جدي الي جريب من دارهم ومن هذاك اليوم ولاد خالتي جل يوم بمشكلة....

بقلم: وليد التميمي

قواريط خالتي / وليد التميمي

قواريط خالتي / وليد التميمي :: تعاليق

قواريط خالتي / وليد التميمي

مواضيع مماثلة

مواضيع مماثلة