متابعات
مختارات
المشاركات : 1292
. : 
 | موضوع: أنصحك بقراءة التالي  13.02.10 20:46 | |
|
إذا كنت من مواليد 1986 --لل1990 أنصحك بقراءة التالي
1- إذا كنت من الناس اللي حضرو بالمرحلة الابتدائية مسلسل ماوكلي وبرنامج بريد الأطفال اللي كانت تئدمو ماما فاتنة الله يعدمنا ياها و الكابتن ماجد , أما بمرحلة الإعدادي مسلسل الرجل الآلي و أبو الهنا و جميل و هناء .
2- إذا تابعت كل الإعلانات الحلوة اللي كانت تطلع ع قناة البرنامج العام متل دعاية محارم ديمة و علكة منطاد و شراب سن كويك و بطاطا لوكس و شوكولا سوارين الخ .....
3- إذا لحئت الإشاعة اللي بتئول أنو ما تطلع بتكسي لانسر لأنو صريفة و العداد بيئلب هاد غير شوفيرياتا اللي نصون وخم.
4- إذا لحئت الدعايات اللي كانو يطلعو بعد نشرة أخبار الساعة 8.30 اللي بيطلعو بشاشة زرقا و فيا كتابة عم تطلع من تحت لفوق و كانو ع الأغلب يا مشان التطوع بالكلية الحربية يا لترشيد استخدام الكهرباء و الماء يا مشان تنبيه الأخوة المواطنين ع ضرورة التبرع بالدم .
5- إذا لحئت مقدمة الأخبار القديمة , و اللي كان يقدما مهران يوسف و ميساء سلوم و رائدة وقّاف و علاء الدين الأيوبي قبل ما يصير مندوب وزارة العدل للتلفزيون السوري.
6- إذا لحئت ولادة الإذاعة اللي كسرت الدنيا و بعد طول انتظار و اللي صرت تتباها فيا بوصول وطنك للتطور بأن صار عندو مساحة ع موجة الFM وئت طلعت إذاعة صوت الشباب بسنة ال 2000كما أذكر.
7- و ع سيرة سنة ال 2000 لا تئلي أنو ما فكرت (بينك و بين حالك) بالكلام اللي كنت تسمعو كتير عن المشاكل اللي رح تصير الساعة 12.00 بالليل يوم31/12/1999 و أنو أشفي أجهزة كهربائية و الكترونية عليها السلام
8- إذا كنت عاصرت غنية الحب الحقيقي لمحمد فؤاد قبل ما يصير دب قطبي و غنية علمتيني أحب الدنيا لراغب علامة و ما بقاش أنا لأصالة , و بالله يا سايق الهجن أمشي على هونك لشادي جميل و غنية ربا الجمال تبع أسأل روحك اللي كانت تطلع بحفلة ع القناة الأولى و غنية ديانا حداد (ساكن) و عودوني لعمر دياب و مصطفى قمر المعلاق و غنيته الليله دوووب و إذا كنت شهدت ولادة نجم عالمي جديد اسمو علي الحجار و أليوم روح روحي لنجوى كرم و النجاح اللي حققتو من ورا هالأليوم وخاصةً بين أواسط شوفيرية السرافيس و التكاسي و اشتريت كاسيتات عمرو دياب و لبست نفس البلوزة اللي لبسا بفيديو كليب تملي معاك و حطيت 2كغ جيل ع شعرك و سئلتو لورا حتى صار يزحلط ع ئد مو زفر مشان تساوي متلو بكليب عودوني, و أيام ما تسجل على ورقة المنوعات اللي بدك تسجلا ع شريط كاسيت و ترو لعند المحل و تطلب تطبيق هالأغاني ع شريطMacxell حصراً لأنو أداؤه أحسن الشي هيك كنا مفكرين .
9- إذا وئفت العصريات بالصيف ع البلكون بعد ما تكبلك سطلين مي مشان الرطوبة و شعلت شريط كاظم الساهر تبع مدرسة الحب و وقفت بالفانيلا الصيفية و بأيدك سلسال عم تلولح فيه و حاطط راست تحت المي و عم بتنفض بشعراتك و أنت عم تنوضر ع ببت الجيران .
10- إذا كنت عم تتابع برنامج ما يطلبه الجمهور و عم تئول لحالك عسى و لعلى يطلعك شي غنية عليها القيمة , بس وئت شفت الشريط اللي بيحطوا فيه الأغاني الموجودة لحلقة اليوم , انصدمت و حشكت و قلبت التلفزيون ع القناة التانية و كان طالع فلم أجنبي لليافعين موضوعه عن الأحصنة و تربيتون , أجباري رح تئبل فيه مو بكيفك .
11- إذا شعرت بقرحة مزمنة الساعة 4 بعد مارجعت من المدرسة و كان دوامك الضهر وخلصوا برامج الأطفال الله يجعلون برامج أطفال و بلشنا ئرح بئاااااااااااا , ع برامج القناة الأولى مع العمال , مع الحرفيين , مع الطلبة , مع المقاتلين , مجلة الأمل , مجلة الأسرة , أبناؤنا بالجولان.....
12- إذا ئضيت يوم عيد الأم ربعو مع أم عمار(ماريا ديب وبرنامج ما يطلبه المشاهدون حلقة خاصة) و ربعه مع جهاد سعد (برنامج خبرني يا طير ) و نصه نقل مباشر من عين التينة بالجولان و شلون الاحتلال الغاشم عم يفرق بين الأمهات و الأولاد و شلون عم يقطع أوصار المحبة الأسروية , بس هالشي ما منع الشعب الحي من أنو يروح ع عين التينة و ياخد المكيرفون و يجوجئ من ضفة لضفة مع أنو بحطون برئبتي ما حدا فهمان ع حدا و ماحدا سمعان حدا .
13- إذا كنت من هواة بسكويت السحب اللي كان يربح هدايا حدث و لا حرج , ولا من هواة الستيكرز جمع ألبوات صور كبتن ماجد و كابتن رابح و البوكيمون ووووو الخ. و مين فينا ما راح صرف خرجيتو و لطش خرجية حدا من أخوتو مشان يشتري علية مسكة كاملة عسى و لعلى بتطلعو بألبا صورة مختومنة , أصلاً ما اغتنت شركة خيري و كلاس إلا من ورا طشمنتنا .
14- إذا شفت التيشرتات اللي كانو يحطوا عليها صور نجوى كرم و نوال الزغبي و جورج وسوف و اللي إذا نزلت ع شارع القوتلي بهداك الوئت كنت تشوف الحبتية و العساكر لابسين منون.
15- مين فينا ما طرئو عين لرفيئو بالمدرسة اللي أجا عم يئلو أنو ركبنا ديش قطروا 9 متار و بيطالع 80 قناية و أخد عنو فكرة أنو رفيئوا يا كداب يا ظاظ وحدة من التنتين كيف لا و أنو كان الديش يكلف بين ال 60 و ال 100 ألف ليرة.
16- مين فينا ما انعمت عيونو و هو عم يلعب أتاري سيغا أبو الجويستيك اللي ئد الجحش و اللي لازم تكبس زر ال شي 4-5c مرات حتى تضرب الخصم إذا كنت عم تلعب مورتال كومبت و مشان ينط إذا كنت عم تلعب ماريو .
17- مين فينا ما كان مفكر أنو عندو ثروة ثقافية أو مجموعة بمجرد احتفاظو بشي 20أو 25 لغز من الألغاز تبع هدول المغامرين الخمسة (لوزة , و نوسة , و عاكف و وطوط ما بعرف شو ,,,,,)
18- مين فينا مالعب الميكانو لعبة مهندسي المستقبل ,وحلم يشتري طابة أوفيشال تبعيت مونديال ال 98 الأصلية .
19- مين فينا ما انحر ع نادي الاتحاد وئت خسر مع الحرية 4-0 أيام العفش ئبل ما يفجر قنبلة بالأوساط الرياضية بأنو أجا عرض ليحترف بأوربا (نادي قبرصي درجة ألف) هو و سيد بيازيد .
21- مين فينا كان يحب مسلسل بطوط الضراب السخن (بطوط الشهير)
22- مين فينا ماكان يحلم ببسكليت 24 أبو العيارات , و يحلم بال والك مان تبع الشريط ؟؟
23- مين فينا أيام ما كان صغير ما خوفوا أهلو من العتمة و من سبدلا اللي كان حسب الرواية أنو رح يشق الحيط و يتدلى , يلعن تمو هالسبدلا اش مشهور علي الحلال أشهر من نانسي عجرم هلق .
24- مين فينا ما سمع الديو بين وائل كفوري و نوال الزغبي (مين حبيبي أنا ) و بين راغب علامة و أليسا (بتغيب بتروح).
25- مين فينا ما شاف رأفت الهجان و ما كان يفهم منو شي (بس عبتابعو لأنو أبو و أمو عم يشوفو) بس ساوا حجة مشان يسهر شوي زيادة.
28- مين فينا ما كاااااااااااااااان معلائو تئيل و غليظ أيام الاعدادي ., وئت كنا نفكر حالنا صرنا رجاااااااال صوتا تخين و خطوا شواربنا و خود ع بياخة ...
29- مين فينا ما كانو رفئاتو يصرخولو بكنيتو و هو يصرخ لرفئاتو كمان بالكنية أيام الاعدادي , وخصوصاً وكنت كنا نلعب طابة .
31- مين فينا ما لبس السبدرينة أم الضو اللي كنا نروح فيا ع المدرسة و نتبروظ فيا , و البروظة كانت تكمل إذا كان عريف الصف أو انضباط أو حتى عريف طليعة سادسة .
32- مين فينا أيام الأعدادي ما كان يشيل الكتافيات و يقلب كمام البدلة بعدما يطلع من المدرسة , هاد إذا ماكان شاري نضارات شمس أم ال 25 و حطون هيك شغل ضوج .
33- مين فينا ما اتئلع و اتسكر الخط بوشو مليون مرة وئت كان يتصل برفيئو مشان يسألو من وين لوين داخل معنا بالمذاكرة و هو بيعرف أش داخل بس اتصل ئصادن مشان يضيع وئت و يستعمل التليفون الجديد اللي مع عم يرن يا حسرتي.
34- مين فينا ماكان يموت من الرعبة ئبل ما يدخل ع البيت الساعة 9 المسا لأنو أبو و أموه بدون يشبحو ع القمر لأنو اتأخر ع البيت و موصينو أنو بعد الساعة 7 مافي دخلة ع البيت بس الله يلعن رفاق السوء .
35- مين فينا ما كان يئتل حالو مشان تاخدو أمو ع السبيل , أنو بس بدي أفهم أش كنا نلاقي فيه حتى كل هاد كنا نحبو .
36- مين فينا كان يحب المسلسلات المصرية اللي كانت تطلع ع التلفزيون الساعة 11.30 و اللي كانو المصاروة هنن ذاتون كابين هالمسلسلات الصعيدية اللي ضعيفة ع كل المستويات (لا قصة متل الخلق لا سيناريو لا حوار لا إخراج لا تمثيل لا حبكة لا تصوير لا إضاءة , لا تأثيرات ) و لك يا جماعة حتى وش حلو يوحد ربو ما كان فيه
38- مين فينا ما تابع مسلسل عيلة 5 نجوم , 6 نجوم , 7 نجوم , و ما بعرف إذا كان فيه 8 نجوم تبع أبوك يالدسك و الواوية و الدست , و أبو كيروز ,,, يلعن أخت هالألفاظ أش حفظناها , ليش كان فيه مسلسل لأندريه سكاف و حسام عيد و نحن بزمناتو كتير كنا نضحك عليه مع أنو كان سخيف جداً , و لسه عائلتي و أنا و المحكوم اللي مثل فيه جمال سليمان , و جريمة بالذاكرة اللي مثلت فيه سمر سامي و مابعرف مين كمان هلق أنا بصراحة كان أخوي كتير يخوفني من هالمسلسل بس ليش كنت أخاف ما بتذكر , و مسلسل الأخوة (زهير عبد الكريم و سلوم حداد و بسام كوسا و أمون منى واصف) و مسلسل هجرة القلوب إلى القلوب (عدنان بركات المرحوم و ما بتذكر مين كمان) , مسلسل يوميات مدير عام غني عن التعريف أكتر الشي بتذكر أنو ضحكت ع شخصية نبيه الحدق اللي لعبا أيمن زيدان ,
41- مين منا ما جمع صور مطربين و رياضين و مشاهير و لزقا هون وهون .
42- مين منا ما اشترا نضارة شمسية ملونة , عدت فترة نزلة موضتون .
43- مين كان يلبس بنطلون ضيق من تحت , هلق أنا ما كنت أتصور حالي لابس هيك بنطلون حتى أيام الابتدائي كان اللي يلبس بنطلون ضيق شوي من تحت كانو يتمسخرو عليه , بس هلق سبحان مغيّر الأحوال .
44- مين فينا ما كان يحلم يروح ع الحلاق لحالو بدون أبوه مشان ما يحلئلو ع كيفو , لأنو هو بدو يخلي الحلاق يحطلوا جيل و يوقف شعر بس أبوه كان يضبعو .
45- مين فينا ما كان يجعر و يبكي ما بدو ياخد دوا السعلة لأنو مر , بس كانت أمو أول الشي يالله حبيبي يا الله هاد دوا ما بيصير لازم تاخدو مشان تطيب و تضل عم تجي معنا بالأسلوب اللين و نحن نتمنع بعدين أنما للصبر حدود ,,,,,, فتاح تمك ولاااك , و هون أنت متل الحباب رح تفتح تمك و تشربو فيا العافية .
46- مين فينا بيئدر ينسا اليجامات النفخ اللي كانوا يلبسوا الأكير مننا هدول اللي أيدهون و أجريهون بيجو زم و ألوانون ياسلااااااااام , شي تريكواز شي زهري مأنشح شي أصفر مخنق .
47- مين فينا ما بيذكر بطاطا زقزوق و ميلان و طبوش ,
48- طيب كازوز جلول و سينالكو و خزنة ؟؟؟
49- مين فينا مابيحب هالشغلات الحلوة كلا فعلاً ,أنت محظوظ فعلاً لأنو حضرت هالئصص مين بيئدر ينكر أنو ماكان مبسوط وئت كان صغير ,بس ما بعرف إذا قدرت أضحكك أو أذكرك بشي حلو كنت نسيانو .
دنيا | |
|
